آلله !
دَره ده تورپاغا، داغلاردا داشا
دریادا سولارا ، گؤزلرده یاشا
اوره یی اوخلایان گؤز اوسته قاشا
باخ اؤزون قدرته، کئف ائله آللاه
*
ساییلمیر گؤیلرده هله کهکشان
بیلینمیر نه واخدان دوزه لیب جهان
آشکار بیر اولسا مین لردی نهان
باخ اؤزون شوکته، کئف ائله آللاه
*
چیرپینان اورک ده سیر یاتاق سالیر
داغلار بیر بالاجا گؤزده یئر آلیر
عاغیل ایشله دیکجه، معطل قالیر
باخ اؤزون حکمته، کئف ائله آللاه
*
بیر بؤیوک آغاجی قورو صحرادا
هرکسین روزوسون وئردین دریادا
هاردا واجب اولدی یئتدین فریادا
باخ اؤزون قسمته، کئف ائله آللاه
*
طغیان ائدن لرین اومودون قیردین
هرکسین قلبینین چؤره یین وئردین
«خلیل»ین چمن ین، «نمرود»ون دردین
باخ اؤزون هیبته ، کئف ائله آللاه
*
بیر امّی قولاغا اوخودون «یاسین»
«لیله القدر» ده «وحی»ن دریاسین
«حجاز»دا ائشیتدین «زمزم» دوعاسین
باخ اؤزون حورمته، کئف ائله آللاه
*
زامانا باغلانیب «قارون»ون‌هایی
تاریخی غرق ائدیب «فرعون»ون چایی
«انا اعطیناک کوثر»ین پایی
باخ اؤزون نعمته، کئف ائله آللاه
*
«قونداقی» ائیله دین کلام صاحبی
«لیله المبیتی» «قرآن» کاتبی
تور آتان، تورونو «عصمت» شاهدی
باخ اؤزون عصمته، کئف ائله آللاه
*
سینیق کونول لره سن مئهمان اولدون
بیز گوناه ائیله دیک سن رحمان اولدون
هاردا درده قالدیق، سن درمان اولدون
باخ اؤزون رحمته، کئف ائله آللاه
*
«چنگیز»ی «هیتلر»ی او ظالیم «بوش» ون
«صدام»کی چکیردی قونشویا قوشون
زاوالا گتیردین «مبارک» هوشون
باخ اؤزون صولته، کئف ائله آللاه
*
صولت عطالو (عطا)